1+1=3!!

النهااردة كان يوم عادى خالص ..
لحد ما امى ربنا يكرمها قالتلى ان انا اروح اشوى السمك .. ربما كانت هذه اول مرة لى ولكننى تأكدت من أخذ العنوان الصحيح وذهبت ..
اول ما وصلت هناك لقيت مكان على تسميتنا بنسميه خرابة او بالأصح مقلب زبالة ..
عرفت ان ده العنوان الغلط .. فرحت سألت .. : يا جماعة فى حد قريب من هنا بيشوى سمك ؟؟
بوجوه متجهمة اشاروا الى تلك الخرابة .. ومضوا في سبيلهم ..
قررت ان ابادر بخطوة شجاعة ودخلت .. ولا استطيع ان اصف لك صدمتى ..
مكان حوله الناس الى مقلب للقمامة وامرأه بسن امى تجلس فى البرد القارس بملابس اكلها الدهر واتى عليها .. تجلس امام كومة من الخشب..
الدخان فى كل مكان .. الرائحة كافية ان تقضى على صدرك فهى كالسجائر بل اشد ..
وهى منهمكة فى العمل ..
مشيت اليها بخطوات مصدومة واعطيتها السمك وطلبت منها ان تشويه لها .. اخذته وابتسمت لى ابتسامة ظهرت فيها اسنانها الصفراء التى سقط معظمها .. وبدأت تشوى ..
اخذت افكر ..
لماذا ؟؟
ابه اللى اجبر ست بعمر امى وممكن اكبر تعد الاعدة ده وتتبهدل البهدلة ده .. !!
سألتها : يا حاجة الدخان مش بيتعبك ؟
ردت علييا : ربنا بيستر امال ناكل عيشنا منين ..يعنى نشحت ؟؟
قولتلها يا حاجة : بس صحتك الله يسترك ..
قالتلى : وولادى اولى منى بحتة الصحة اللى فاضلة ..
قولتلها والحكومة ؟؟ المفروض بتساعد .. اى حاجة ..
ضحكت بصوت عالى وقالتى الحكومة ؟؟ الحكومة بتاخد منى 300 جنيه فى الشهر ضرايب !!
الحكومة كل ما اتأخر عن الدفع ييجوا يكسروا الحتة ويضربونى ويخرجونى .. لحد ما ييجى واحد من ولاد الحلال يدفع ليهم ..
سكت ..
ربما اسكتتنى الصدمة .. ربما اسكتنى الحزن ..
ولكننى فقط سكت ..
انتهت من الشوي .. اديتها حقها وزايد عليه اتنين تلاتة جنيه .. بجد اعدت تدعيلى ولا دعوة سعد بن ابى الوقاص ..
استلمت منها السمك ... ومشيت ..
واعدت افكر .. لييه ؟؟
ليه الراجل بتاع الدولة يبقى معاه مليارات ودول مش عارفين ياكلوا ؟؟
ليه الراجل اللى غرق اهلى فى العبارة يهرب برة بفلوسه وماحدش عارف يجيبه ؟؟
ليه بنوك مدينتى اللى اجدادنا تعبوا عشان يكونوها بتتباع برخص التراب ؟؟
لييه احسن الاراضي فى بلدى بتتوزع على رجال الاعمال وكل واحد يبيعها بمزاجه ولحسايه ؟؟
اى قاعدة فى العالم بتمشي كده ؟؟
اى قانون فى العالم بيوافق على كده؟؟
دول كده كسروا كل قوانين الدنيا ..
وانا كده اظن ان احنا بلد كسروا فيها كل القواعد والقوانين ..
مش واحدة بس .. الموضوع اكبر بكتيير ..
الراجل اللى واقف فى فرن العيش .. الراجل اللى بيكنس الشارع وما بيمدش ايده لحد ولا لحرام .. الست اللى بتعد بالسبع ساعات واقفة فى نص الطريق بتبيع فجل او بقدونس .. الناس اللى لحد الوقتى مايعرفوش يعنى ايه ميية نضيفة او حتى يعنى ايه كهربا !!!
بعد كل ده من حقى انا كمان ان انا اكسر قوانين الرياضة واقول ان 1+1=3
من حقى افضل اتكلم وماسكتش حتى ولو كسرونى وبهدلونى ...
ده حقى ..
ومفيش تنازل ..